الحجار
عدد المساهمات : 70
تاريخ التسجيل : 01/01/2014
 |  موضوع: قصيدة ((جيب عيون)) مبرئين الذمَّه  الخميس يناير 16, 2014 6:15 pm | |
|
((جيب عيون))
****************
جيب عيون تتحمل دمع عيني
جيب كلوب تتحمله لونينـــــي
من مصيبه لمصيبه **منّي الراح شيجيبه
*******************
الفرح لومرَّه مر بيَّه مثل الطيف لو مرنـــــي
يظل يحسبها هل اللحظه عليَّه وظل يمرمرني
وأخذ من دنيتي افراحي بحسره وآه حيّرنـــي
ماريدك أكلّه روح وظل حزني يصبّرنـــــــي
آنه أتعوَّدت من زغري عالآلآم
أتوشّح همومي والدمــع لونـــام
وصبّح طايحه بنيبه ****منّي الراح شيجيبه
*********************
أفتّح عيني ألاكي الهم ناطرني عله باب الدار
الظيم مرافك أيامي يفرح بيَّه اذا أحتـــــــــــار
الآم السنين تصير سهام ودمه ولهبت نــــــار
أشوفهن كل هلي بيها ماجن هلي جن خطّــار
حلم مثل السراب يصير كدَّامي
ودوِّر هلي وين بين أحلامـــي
حالي حال الغريبه **منّي الراح شيجيبه
*****************
زماني واعد الاحزان وسط كلبـــــي يخلّيها
دعه أيامي بسهامه ذبح كلشــــــي حلو بيها
جرح مايشفه تبدي جروح مايرضه يداويها
ودموعي تصب جمرات والنـــــار شطفّيها
دمعي مايداوي جروح ضلع امي
برمشة عين راح النور من يمّي
أظلَّن عايشه بريبه **منّي الراح شيجيبه
******************
لاجت روحي لمَّن راح بطلعته حسبت الف حساب
جرح ضلع أمي صب دمعه خذتها آلامي للمحراب
كبلها جنت أتانــــــــــــي يعود ومناطره بسد الباب
رجــع وظنونــي لاكنّــه بصرخــة والدمــع سجّاب
جفوف وسادته وضلوعي غطنَّه
الموت بفركته كل لحظـــه أتمنَّه
جرحي ماأله طيبه **منّي الراح شيجيبه
*****************
شكولن عن جبد مسموم راح ألّي حفظ دمنه
أعاين عالطشت ونحب ريت أحنه التسممنه
مصاب الحسن دولبنـــــــي وتشتتنه شيلمنه
ليـــــل بلا نهــــــار أيمر بأبويه لحَّك وأمنه
الشمس والكمر أنظر والنجم يهوه
طول الليل نوحي الدمعتــي سلوه
يحن كلبي ونحيبه **منّي الراح شيجيبه
******************
خذاني دهري لرض الطف والايـام خذلتني
عيني فاركت شبّان بالدمعات حنّتنــــــــــي
خذت مني كمر هاشم جفوفه وعينه لعمتني
ودّعت الذبيح حسين يريت ويــــاه ذبحتني
مصيبة كربله ماخلَّت بحالي
ظلَّت عايشه بوجداني وبّالي
عجايب موعجيبه **منّي الراح شيجيبه
| |
|
أم طاهر
إداريه
عدد المساهمات : 1625
تاريخ التسجيل : 09/11/2011
| | موضوع: رد: قصيدة ((جيب عيون)) مبرئين الذمَّه السبت يناير 18, 2014 6:58 pm | |
| اللهم صل على محمد وال محمد وعجل فرجهم وأهلك عدوهم
شكرا لك على هذه القصيدة | |
|
